Psa 101 | KYG | STEP | Ala kava nene, hu'na, Nagaemo kahau huka ne'atana kavaka'e alagepa huka alika fako huka ne'atana kavakale'efe'mo yoke huguve. Ala kava nene, hu'na, kagaefeke'mo yoke huguve.

Psalms 101

Nevini'a ina kava huguve, huno hu'niya gemae

1 Ala kava nene, hu'na, Nagaemo kahau huka ne'atana kavaka'e alagepa huka alika fako huka ne'atana kavakale'efe'mo yoke huguve. Ala kava nene, hu'na, kagaefeke'mo yoke huguve. 2 Age'na aeto hute'nae'mo afite'na vai'mo alagi o'alisuva kate'mo uguve. Hainu afina'mo nagaetegamo egane. Nagaemo no'nifi'mo mai'ne'nae'mo ali'ya'nimo ne'aliya vaya'aite'mo yagai'na apate'ne'nae'mo vai'mo alagi o'alisuvana alagepa kava'age'mo hu'na maiguve. 3 Nagaemo hosu kava'mo hisuvafe'mo nagesamo o'afiguve. Alagepa ka'mo atale'a ne'vaya vaya'ai kava'apie'mo alagi o'nahau'niyanageno ani agufa hosu kava'apimo'a nagaete'mo aino okamaegaiye. 4 Aigofe kava'mo osu'na hosu apaipa vaya'mo hapafai'na apatalegauve. 5 Hu'a faipa hu'a ne'ataya vaya'mo hapafai'na apatalegauve. Ala vaya'mo mai'none, hu'a hute'a himu'namu kava'mo nehaya vaya'mo nagae'e'mo o'maigae. 6 Nagaemo Goti ge'amo o'atale'a akame nehaya vaya'aife'mo amuse hu'na apatesuge'a nagae'e'mo magokepi lokae'a maigae. Aigofe gemo nosaya vaya'amogige'mo ali'ya'nimo aligae. 7 Ae'a ati nekaya vaya'mo no'nifi'mo hai'a o'maigae. Aigofe gemo nehaya vaya'mo nagae'e'mo magokepi lokae'a o'maigae. 8 Malage hu'na he ti'na hosu vaya'mo ali'na hano hu'na apatalete'na hosu kava'mo nehaya vaya'mo Ala kava ne'mo taonifati'mo ali'na hapa fai'na apatalegauve.